Friday, February 22, 2013

സ്നേഹം,

സ്നേഹം, 
എനിക്കെന്നോട് മാത്രം തോന്നിയത്.
അവിടെ നീയോ നിങ്ങളോയില്ല, 
ഞാനുമെന്നോടുള്ള സ്നേഹവും മാത്രം. 

ആത്മരതിയ്ക്കുമപ്പുറം ചിലതുണ്ട്; 
വികാരവിക്ഷോഭങ്ങള്‍ക്കിടയില്‍ 
മറന്നു പോകുന്ന ഹൃദയസ്പന്ദനങ്ങള്‍; 
അമ്മ, അച്ഛന്‍ കൂടെപ്പിറപ്പുകള്‍.. 

ഒടുവിലൊന്നുമില്ലാത്ത,
ഒറ്റയ്ക്കാകുന്ന അവസ്ഥയില്‍
ഒന്ന് തിരിഞ്ഞു നോക്കണം,
സ്വന്തം നിഴലെങ്കിലുമുണ്ടോയെന്ന്.

ഇനി വാക്കുകള്‍കൊണ്ടെനിക്കൊന്ന്
സ്നേഹിക്കണം; നിന്നേയും
പിന്നെയാ മണ്ണിലലിഞ്ഞുപോയ
എന്‍റെ ഹൃദയ സ്പങ്ങനങ്ങളേയും.

ഇനിയെനിക്കെന്‍റെ ഹൃദയം കൊണ്ടൊന്ന്
സ്നേഹിക്കണം; എന്നോ മറഞ്ഞ
മണ്‍ചെരാതുകളിലെ
അണഞ്ഞുപോയ വെളിച്ചങ്ങളെ.

എനിക്കിപ്പോള്‍ കാണാം;
അങ്ങകലെയൊന്നിലധികം
നക്ഷത്രങ്ങള്‍ പുഞ്ചിരിക്കുന്നു,
മണ്ണില്‍ പൊതിഞ്ഞ ഹൃദയങ്ങള്‍ പോലെ.

No comments:

Post a Comment

സത്യസന്ധമായ അഭിപ്രായം എഴുതുമല്ലോ?