സൂര്യകാന്തി പൂവ്.

നിന്നോടൊരുപാട് പറയുവാനുണ്ടി, 
ന്നൊത്തിരി നാളായി കാണൂന്നതല്ലേ.
കേള്‍ക്കാതെ പോകരുതിന്നെങ്കിലും 
ഇനിയതു കഴിയാതെ വന്നെങ്കിലോ? 

ഭയം വേണ്ട, ഞാന്‍ പോകില്ലയാ 
കോളേജിന്‍ നീണ്ട വരാന്തയിലേക്ക്. 
പോകില്ലയാ ഇടവഴിയിലേക്കും
മറക്കാന്‍ കൊതിക്കുമോര്‍മ്മയിലേക്കും.

സുഖമാണൊയെന്നൊരു
വാക്ക് ചോദിക്കുന്നില്ല;
നിന്‍റെ കണ്ണൂകളതെന്നോട്
പറയാതെ പറയുന്നു.

ജീവിത പ്രാരാബ്ദമേറെയുണ്ടല്ലേ,
ഒട്ടിയ കവിളുകള്‍ പല്ലിനെ പുല്‍കുന്നു.
കരുവാളിച്ച ചുണ്ടിലെ
ശോഷിച്ച പുഞ്ചിരി
കാര്‍മേഘത്തിനുള്ളിലെ
സൂര്യനെ പോല്‍..

വേണ്ട, എനിക്കൊന്നും
ചോദിക്കാനില്ലിനി,
നിന്‍റെ രൂപമാറ്റത്തിലെന്‍
മനസ്സൊന്നിടയുന്നു.

വിടപറഞ്ഞകലവേ
എന്നിലേക്കെത്തുന്നു,
സൂര്യനെ പ്രണയിച്ചൊരു
സൂര്യകാന്തി പൂവ്.